ՙ
ԿՆՀ լաբորատորիայի գործունեության հիմնական գիտական ուղղությունն օրգանիզմի շարժական ակտիվության կառավարման համեմատական ֆիզիոլոգիական հետազոտությունն է: Երկկենցաղների անդաստակային և ուղեղիկային կորիզների յուրահատկությունը կայանում է նրանց զգալի ձևափոխության մեջ, որն արտահայտում է բնակության միջավայրի փոփոխությունները (մասնակի կամ լրիվ անցում ցամաքի) և չորքոտանի մարմնի զարգացումը: Հանդիսանալով անպոչների զարգացման վաղ փուլ՝ երկկենցաղները չորքոտանիների մեջ օժտված են ամենաքիչ տերբերակված անդաստակա-ուղեղիկային կազմավորումներով: Չնայած դրան, արդեն իսկ այդ փուլում անդաստակային կորիզային համակարգը (ԱԿՀ) ներկայացնում է կենտրոնական կազմավորում, որն ինտեգրում է լաբիրինթոսից, ուղեղիկից, ողնուղեղից և ցանցաձև գոյացությունից եկող ազդանշանները:
Կատարված փորձերի հիման վրա վերջին տասնամյակում որոշակի օրիգինալ արդյունքներ են ստացվել: Անդաստակային նյարդի գրգռման հետևանքով ներբջջային գրանցված գրգռիչ հետսինապտիկ պոտենցիալները, գործողության պոտենցիալի (ԳՊ) անցումով, ունեին մոնո- և պոլիսինապտիկ ծագում:
Ցույց է տրված, որ ողնուղեղի պարանոցային և գոտկային նեյրոնները գորտի ԱԿՀ-ում, որպես անդաստակա-ողնուղեղային նյարդաթելերի աղբյուր, տարածված են առանձին կամ ավելի հաճախ փոքր խմբերով, ինչը բերում է կարկատանանման սոմատոտոպիայի, այլ ոչ թե զոնային սոմատոտոպիայի, ինչպես դա նկատվում է կաթնասունների մոտ:
Անդաստակային նյարդի գրգռումն առաջացնում է քիմիապես փոխանցվող մոնո- և պոլիսինապտիկ պոտենցիալներ օրթոդրոմ ԳՊ-ներով միջանկյալ ցանցաձև գոյացության նեյրոններում:
Գորտի պերֆուզվող ուղեղի պատրաստուկի վրա կատարված փորձերում հետազոտվել են ուղեղիկի կեղևի համակողմ աուրիկուլյար հատվածի գրգռմանն ի պատասխան ԱԿՀ նեյրոնների ներբջջային պոտենցիալները: Բացահայտված է, որ վերջինիս գրգռումն առաջացնում է մոնո- և պոլիսինապտիկ հետսինապտիկ արգելակիչ պոտենցիալներ ԱԿՀ նեյրոններում:
Ներկայումս հետազոտություններ են կատարվում, որոնք նվիրված են ցանցաձև գոյացության նեյրոնների վրա ուղեղիկի աուրիկուլյար բլթակի ազդեցության ուսումնասիրմանը: